دكتوره عبير مراد تكتب عن وعى الشعب فى زمن الحداثة

✅✍️وجه نظر وبس

👌وعي الشعب هو خط الدفاع الأول🤙

 

في زمن أصبحت فيه مواقع التواصل الاجتماعي مثل فيسبوك وتيك توك مسرحًا للشائعات، لازم كل مواطن مصري يكون واعي ومدرك إن مش كل اللي بيتنشر يتحطّ عليه كلمة “حقيقة”. في محتوى كتير بيتعمل مخصوص لإثارة البلبلة، وتشويه الصورة، وهدم قيم المجتمع المصري، سواء من حسابات مجهولة أو من ناس هدفها الأول والأخير جمع المشاهدات والمال.😡

 

إحنا كشعب شفنا بعينينا يعني إيه غياب الأمان، وشفنا بعد 2011 قد إيه الإشاعات لعبت دور كبير في ضرب استقرار البلد. ومن بعدها كلنا لمسنا إن الأمان رجع مع الدولة، ومع القيادة السياسية، ومع خطوات واضحة لبناء بلد قوية ومستقرة.💝

 

النهارده في ناس على تيك توك وغيرها بتنشر قصص مالهاش وجود، وبتختلق أحداث علشان تربح مشاهدات، وده بيسهم في إرباك الناس ونشر الفتنة بدون أي مسؤولية. وأنا ضد الهرتلة دي وضد كل محتوى بيستهدف وعي المجتمع ويشوّش عقول الشباب.🚨

 

مصر بلد كبيرة، ورئيسنا عمل مشاريع وبنية تحتية وتغييرات محدش يقدر ينكرها، والأمان اللي عايشينه النهاردة مش شيء بسيط. علشان كده لازم كلنا نقف مع بلدنا، نقف مع الدولة، لأن المستقبل محتاج وعي قبل ما يحتاج كلام.💯

 

أفضل رد على الإشاعات هو العقل، وأفضل طريقة لمواجهة المحتوى المضلل هي إلغاء المتابعة لأي حساب مش موثوق، وعدم تصديق أي كلمة إلا لما يكون مصدرها رسمي وواضح.🌹

 

وعلشان نحافظ على بلدنا، لازم كل واحد فينا يكون خط دفاع، لأن الأمان مش بس مسؤولية الحكومة… الأمان مسؤولية شعب كامل

الدكتورة.. عبير فاروق مراد