كتب الاعلامي: أحمد الطيب
جبل المقطم عندما نقرء او نسمع اسمه نتخيل شكله الجميل و الرائع و ان كان لنا ذاكرة معه نستمتع بها ولا نعلم ما بداخله.
هل تعلم عدد الصحابة المدفونين أسفل جبل المقطم على الأتوستراد قبل الأباجية
إنتا هتركب أي مكروباص للإتوستراد و هتنزل عند القرافة ..
تمام ؟؟
تطلع ع الأباجية و تسأل عالقرافة الصغرى ..
هتلاقي مسجد إسمه الليث بن سعد ..
هتدخل و تفضل ماشي هتلاقي ضريح ذو النون المصري …..
هتخليه على يمينك و تفضل ماشي هتلاقي نفسك بين ضريحين..
واحد مكتوب عليه رابعة العدوية ( أيوه ستنا السيدة الشريفة رابعة العدوية مستغرب ليه ) أصبر بس التقيل ورا …..
و التاني هتلاقي مكتوب عليه محمد بن الحنفية بن علي بن أبي طالب ( آه و الله) ..
هتسيبهم و تكمل مشي هتلاقي بره كده على يمينك قبة مكتوب عليها ضريح الشريفة فاطمة حسن الأنور …
خد نفسك شوية و كمل مشي هتلاقي مسجد سيدي عقبة بن عامر الجهني ( كل دول أسيادنا من السلف الصالح خللي بالك) ..
هااا الحمد لله وصلت ؟
شايف بقى الضريح أبو القبة الكبير ده إللي في نص المسجد ؟
سيبك منه دلوقتي ( الموضوع كبير ) و كمل لحد الباب الخلفي للمسجد هتلاقي مربع متر في متر مدهون دهان أخضر تعبان قوي ع الأرض عدل ..
لا يا جميل ده مش مصطبة بلدي بتاعة واحد غلبان عشان سيادتك تقعد و تأنتخ عليها !!!
دا بقا و يا عارنا المخزي ..
يبقا قبر سيدي و سيدك و سيدنا كلنا ..
عمرو بن العاص
مشفتوش مهزلة أكتر من كده ؟؟
لا يا سيدي مش مدفون في المسجد إللي في مصر القديمة زي ما كنا فاكريين …
طب ليه مفيش قبة ومحدش يعرف مكانه؟؟
لأن تم تهميشه بشكل مبالغ فيه أيام الفاطميين و أكيد عارفين ليه الفاطميين الشيعة بيكرهوا سيدنا عمرو بن العاص عمى… و الخلاف معروف تاريخياً و مش وقته دلوقتي …
طب ليه ماحاولوش يبنوا قبة بعد الفاطميين؟؟
عشان كانوا بينفذوا وصية عمرو بن العاص إنه محدش يبني على قبره قباب و شواهد و يبقا قبر بسيط و صغير و كمان خوفاً عليه من الشيعة و جبروتهم …
طب العظماء دول مدفونين هنا ليه ؟؟
المقوقس كان ماشي مع عمرو بن العاص مرة فقالوا إن جبل المقطم بيطلع فيه شجر من الجنة و إنه مكان طاهر و سيدنا عمر بن الخطاب وصى بدفن المسلمين فيها …
خلصت لف ؟ !!…
أخرج بره خالص بقا و أنزل تحت في القرافة الكبرى هتلاقي بقا الإمام الشافعي و الملك العادل و قايتباي و خلفاء المماليك و العباسيين و الفاطميين و المقريزي و إبن عطاء الله السكندري و, الإمام الشاطبي أشهر من جمع قراءات القرآن على مقربة منهم و كل إللي ودنك سمعت عنهم من قبل …
أتفرج و أستمتع، و أتعلم و أعرف تاريخك الاسلامي
