ابو تريكة وجهة الأخلاق الرياضية

 

 

كتب / محمد فاروق

 

 

 

 

لما محمد أبوتريكة اتسأل عن رجل الأوقات الصعبة؟ اتكلم عن عماد متعب بسبب إنه كان حاسم في ماتشات صعبة كتير.

 

مع إن نص أهداف أبوتريكة تنحصر ما بين الدقيقة 85 لما بعد الدقيقة 90.

 

لما محمد سعدون الكواري سأل أبوتريكة عن أسعد لحظات حياته؟ رد وقال هدف قفشة فى الزمالك. 

 

مع إن هدف أبوتريكة فى الصفاقسى 2006 شق سكون الليل من الفرحة – وهدف الفوز على الكاميرون فى نهائي كأس الأمم واللي تقريباً مفيش مصرى يقدر ينساه – وهدفين في أورلاندو بايرتس في نهائي دوري أبطال أفريقيا وبهم مع أحمد عبد الظاهر الأهلي خد البطولة.

 

أبوتريكة لما اتسأل مين أفضل لاعب فى تاريخ النادي الأهلي؟ رد وقال كابتن محمود الخطيب. 

 

مع إن أبوتريكة مع الأهلي حقق 5 دورى أبطال أفريقيا و7 دوري و3 كأس و4 سوبر أفريقي و6 سوبر ساهم في 9 بطولات قارية من أصل 21 .. أي ما يقرب من 50% من تاريخ الأهلي الأفريقي.. ورغم ذلك قال إن الخطيب هو الأفضل في تاريخ الأهلي.

 

أبوتريكة قبل كأس أمم أفريقيا 2019 في ستوديو bein sport قال “مصر لو احتاجت عيني وقلبي أنا تحت أمرها”

 

رغم الظلم اللي شافه والتحفظ على كل فلوسه واللي وصل به الأمر إنه اتمنع من دخول مصر وحتى محضرش مراسم دفن والده.

 

أبوتريكة اللي رفض أهم وأكبر عرض له في تاريخ أي لاعب من مصر “عرض الهلال السعودي بـ اتنين مليون دولار سنوياً في عز ما كان أتخن لاعب بياخد مليون جنيه أو 2” بعد كأس العالم للأندية 2009 وقال “مينفعش الجمهور يساندنا في أزمتنا وأنا أسيبهم وامشي”.

 

أبوتريكة اللي نجيب ساويرس اداله شيك بمليون جنيه في عز ما كان الجنيه جنيه وكان الكلام دا أدام سمير زاهر وكل أعضاء اتحاد الكرة ورفض أبوتريكة ياخده ومع الضغط خده وشكر ساويرس وقام متبرع به لدور الأيتام بعلم اتحاد الكرة كله.

 

أبوتريكة اللي رفض لعب بطولة السوبر المصري احتراماً لـ الشهداء وتم تغريمه بأكبر غرامة حصلت في تاريخ مصر – لكن قصاد كدا كسب محبة الجمهور الأهم من كل شيء.

 

أبوتريكة اللي فى تاني موسم ليه مع الأهلي حقق الخماسية التاريخية بجانب إنجاز تاريخي وقتها وهو الحصول على برونزية كأس العالم للأندية ده غير إنه حصل على هداف البطولة برصيد 3 أهداف متفوقاً على أفضل لاعبي العالم.

 

أبوتريكة اللي كان وما زال متصدر قائمة هدافي الأهلي فى دورى الأبطال بـ33 هدف وفي ماتشات الزمالك بـ 13 هدف ولا ننسى إنه واحد من أصحاب نادي المائة بـ106 هدف وأفضل لاعب داخل قارة أفريقيا 4 مرات.

 

أبوتريكة اللي حقق أفضل لاعب في مصر في 5 مواسم متتالية ودا ثبات مستوى رهيب صعب يتميز به لاعب مصري في الوقت الحالي.

 

أبوتريكة لاعب عنده ميزة التواضع جوا الملعب وبرا الملعب دايماً تلاقيه هادي في الحزن قبل الفرح، ابتسامته اللي مرسومة على وشه لو غلط أو حد عمل معاه فاول ثم بعدها ثرو أو تسديدة منه بهدف تنهي الماتش.. وبسبب كدا أبوتريكة كان عملة نادرة ولاعب استثنائي صعب يتكرر.

 

مهما حكيت أو اتكلمت عن أبوتريكة فـ حدث ولا حرج من هنا لبكرا..

 

أبوتريكة هو صفقة القرن وأفضل صفقة حصلت داخل جدران النادي.

 

 

 

 

نتمنى الدولة المصرية تصدر قرار سيادي إنساني بالعفو والعوده لابوتريكة.