ربيع جمال الجوهرى يكتب (رسالة من الجيل الجديد الي الجيل القديم)

️ معظم شباب هذا الجيل عايز يقول :-
يا أبويا ، يا جدي أنت من الجيل اللي أول ماخلص دراسه أتوظّف بالدبلوم واشتغل من ٨ الصبح ل٢ الضهر وقدر يفتح بيت ويتجوز بسهوله حتي ولو في اوضه واحدة ،لكن دلوقتي أقل شقه( بناء وتشطيب بربع مليون جنيه)
ده علي أيامكم كان العالم كله كان مفتوح فكنتو تقدروا تسافروا ٣ أو ٤ شهور وتيجوا تتجوزوا (فاكرين العراق اللي كنتوا بسافرولها بعد ما بتبيعوا عنزة أو خروف)
فاكر لما كنت بتتقدم لاي بنت كنت بتتجوزها علي طول ومهرك ٢٠٠ جنيه مع سرير ناموسية وحلة نحاس احمر وطشت
طيب فاكر لما اتجوزت في اوضه جنب اوضه عمي وكان الحمام لما كان مشترك والطبلية كانت واحدة ،وجدي هو الآمر الناهي في البيت وكنتو عايشين علي القليل بكل رضا ومحبة واحترام
ده يكفي إن الطفل لما كان يتولد علي أيامكم كنتوا بتعملوا له (عقيقة )
لكن احنا أغلب جيلنا اتعمل له( سبوع) مش (عقيقه )ودا شكله السبب في اللي احنا فيه!!!
ده إحنا بنشتغل من واحنا لسه بندرس ولما خدنا الشهادة مش لاقيين شغل في مجالنا وبنشتغل من ١٢ الي ١٤ ساعه في أي شغلانه ممكن تجيب فلوس وخلاص والمشكلة إننا مش عارفين نفتح بيوت
وفي الاخر لما نتقدم لبنت علشان نتزوجها ونصون نفسنا ونستّرها تلاقي ابوها بيكلمنا من مناخيره ،علي الرغم من أن ابوها ما عملش ربع اللي احنا بنعمله ،وما تعبش قد ما احنا تعبنا ، وفي الاخر يقول لك :- (جيل ما بيعرفش يتحمل المسئوليه)
بستغرب من الناس اللي بتوصف الجيل الحالي بإنه فاشل ومش بتاع شغل ؟؟؟
لكن ده ما يمنعش إنه فيه شباب مننا عنده استسهال في الاعتماد علي والديه في عملية بناء مستقبله ،والاب والأم يوفرون له لبن العصفور وده بينمي فيه روح الاتكالية وعدم تحمل المسئولية وممكن يفشل في حياته المستقبلية لأن الوالدين مش دايمين ، بس اغلب هذه النماذج من الشباب ناجحه بفلوسها فيا بختهم