ربيع جمال الجوهرى يكتب (خربشات كلامية من واقع الحياة المعيشية)
حياتي وحياتك مليئة ببحار من الخربشات الكلامية التي تعبر عن واقعي وواقعك اسرد لكم منها:-
●جوايا شخصيتين
واحده بتقول لى :- قوم شوف اللي وراك
والتانيه بتقول لي:- كبر دماغك صحتك بالدنيا
●تحس ان الواحد مستمر فى السعى بحجارة ريموت معضعضه .
●المفروض يكتبوا على البطانية كدا الطول وكدا العرض علشان ما اشتغلش فطاطرى طول الليل.
●حضرتك تحب تنصح الأجيال الجايه بأيه؟
- أنصحها ما تجيش
●الواحد بقى محرج من الجزار وبتاع السمك وبتاع الفراخ
ليفتكرو انى بروح اشترى من حد تانى
●أنا حاسس اني مش ملاحق أعمل اي حاجة في حياتي رغم اني ما بعملش حاجة خالص.
● طول عمري مابفكرش ، أنا بهبد القرار ، طلع صح خير وبركة ، طلع غلط بهبد أي مبرر واقنع اللي قدامي
● مش كل النسوان ستات والله
● ايه ده جاكيت ب ٢,٢١٢ جنيه دانا إفتكرته الكود بتاعه
= لا حضرتك هو ده فعلا الكود ، الجاكيت سعره ٤,٣٠٠ جنية يافندم
● طقم حلل ب١٧ وبوتجاز ب٢٠ وطقم صيني ب١٢ وطقم معالق ب٨ عشان نطبخ قلقاس ورز في الاخر!
● الواحد تعبان فلوسياً.
● بيقولك مره واحد شغال في مصلحه حكوميه خلف توأم سمي الاول حمدي والتاني حبصم
● هي ليه السبانخ فيها حديد والحديد ما فيهوش سبانخ؟؟!!
● عاوز حد امين يخش معايا شربك في جاكت جلد
● صدقيني لو الرجل ما كنش غيور و دمه حامي ومكفرك ومطلع عينيكِ يبقي ما بيحبكيش
●إحنا العراقة و الأصالة ده السعودية تأسست ١٩٣٢ والكويت١٩٦١ وقطر و الامارات البحرين١٩٧١ وتركيا ١٩٢٣ لكن- ما شاء الله – قهوة الفيشاوى ١٧٧٩
● وأنت بتقاطع منتجاتهم ، ما تنساش تقاطع :- تقاليدهم ، أفلامهم ، أفكارهم ، ملابسهم
● ياجماعه وانا بفتح برطمان السكر لاقيت فيه نمل متوفي اعمل فيه ايه؟؟!!
● عايز اقعد افضفض مع واحد اخرس.
● اذا رأيتم عمرو اديب يسلك طريق الحق اجري انت على الباطل ما تخفش
● الناس بقت فاكره قله الذوق كاريزما.
● الأسعار غليت فمش هتعرف تتجوز على مراتك، حاول تحبها
●بلاش العشم ياخدك بعيد ، علشان مافيش مواصلات وانت راجع .
●أنا عارف أنك بتعافر و تعبان عشان توصل أقعد إستريح إنت ماشي غلط أصلا .
● انا و البطاطس مهروسين جامد الفترة دى ..
● ماتخليش حد يقولك مش هتقدر !
انت فعلاً مش هتقدر ، بس متخليش حد يقولهالك..
● بيقولك مره واحد حط رغيف عيش تحت المخده عشان يشبع نوم .
● انا الفترة دي بقيت بنفخ ف الشوربة وبنفخ ف الزبادي
وأي حد هييجي ناحيتي هنفخه .
● هل تعلم أن المرأة الحامل هى المرأة الاكثر عُرضه للولاده
●عارفين ليه بنحط اللبن على الشاي ؟
– عشان التفل يرضع
وكل خربشه وحضراتكم طيبون
