زيادة الاسعار تلسع المواطن مع بدء العام الجديد

د.جيلان قاسم

🔷🔶 زيادات الاسعار :

📌 غالبا انا بقالي 4 شهور بقول نوفمبر .. ديسمبر .. يناير .. لحد اخر فبراير

محدش يشتري دهب

اللي عايز يبيع .. يبيع

⚡و قولت ان سوق الدهب ملوش قاعدة حاليا لأن الشرا تم علي اسعار دولار 60 جنيه بنك و ده محصلش

 

ايه بقا الاندهاشة اللي في اسعار الدهب دي .. مش فاهمة الصراحة 🙄

 

📌 السيارات :

من اغسطس من ساعة ما رجعت و انا بقول محدش يشتري عربيات لحد سنة كاملة

الاوفر برايس بتاعها متحدد علي سعر دولار 61 جنيه

و حتي العقود الاجلة معدتش 37 جنيه في نهاية السنة

بتسأل عن العربيات كل يوم من 200 شخص

معقول كل دول معاهم مليون جنيه يشتري كيا سيراتو … و لا هو بنسأل عشان نواكب الموضة 

بس ده غلط 👌🏻

 

العربيات مش هتنزل

العربيات مش هتنزل

العربيات مش هتنزل

محدش يبيع عربيته و يجدد

هيبيع بسعر كاذب و يشتري بسعر مضاعف زائف 🤷🏻‍♀️🤷🏻‍♀️

 

📌 الاجهزة الكهربائية :

اسعارها مش هتنزل قبل 6 شهور

ليييييه 👈🏻 لأن اللي موجود مبيعات دلوقت هو مخزون انتاج تام

تم تصنيعه بمواد خام تمنها مرتفع توافقي مع السوق السودا

يبقا هتنتهي امتي الهيصة دي

مع استقرار الدولار

 

📌 المترو تذكرته زادت :

المفروض كانت هتزيد في يناير 2023 و تم تأجيلها

و انتوا عارفين ده كويس

و كان اعلن عنه وزير النقل و رئيس الوزراء

⚡ليه زاد 👈🏻 لأنه مصدر الدخل للعاملين بيه

و الرواتب بتزيد من 2020

و هو ثابت

ده أحدث عجز في الميزانية الخاصة بيه

و العجز ده بيفضل يسمع لحد موازنة الدولة … لانه مرفق حكومي

بالتالي لم يحتمل تأجيل اخر

 

⚡مفيش لا سولار زاد و لا بنزين زاد

و مفيش مواصلات زادت

لو سواق قرر يزود اجرته .. ده قرار فردي

و انتوا طول عمركم مطيعين

و بتخافوا تودوه القسم

عشان عنده عيال

و علي باب الله انما انتوا علي باب الشيطان غالبا

و بتدفعوا 😏

 

⚡في يونيو 2024 هتزيد الكهربا اللي مزادتش من يونيو 2022

تأجيل رفع الدعم

نظرا للظروف الاقتصادية

و بردو ده اعلنته الدولة في 1 يوليو اللي فات و اتقال ان الدعم 10 مليار جنيه هتتحمله الدولة سنة كمان

 

📌 اسعار كروت الشحن زادت :

ده طلب اتقدم للهيئة العليا للاتصالات من الشركات ال 4 في ابريل 2023 لزيادة الاسعار

لأنهم في المقابل مزودوش من 2019

و طلبوا الزيادة تكون في حدود 15%

من يوليو 2023

الهيئة تفاوضت معاهم ووصلت ل 10% من يناير 2024

و الا كانت الشركات هتعمل تخارج من السوق

و تعيشوا كلكم بخطوط وي وخلاص🤷🏻‍♀️🤷🏻‍♀️ .. و لو تسألوني عن ضميري

يا ريت وي كمان تقفل

 

يعني المواطن اللي في اسكندرية اللي مش مستفيد من المترو

انت بتصيح علينا ليه يا بني 🤔

و اللي معهوش يجيب سكوتر .. مكدرنا بأسعار العربيات ليييييه 🤷🏻‍♀️

ما تولع العربيات فوق دماغ مستورديها

حد قاله ابقا حرامي

ياكش يتسجن حتي احنا ماااااالنا

——————————————————-

🔷🔶 في المقابل بقا

السلع الغذائية اسعارها نزلت في اماكن كتييييير جدااا

و الاسواق الشعبية غير الهايبرز في المناطق الراقية

⚡مكنتش لاقي السكر و كان ب 50 جنيه

دلوقت متوفر في اماكن كتير جدا ب 27 جنيه لحد 32 جنيه و مسموح بكيس او اتنين

ايه المشكلة هو استخدامك كام كيلو سكر يوميا 🤔

⚡البصل : اقسم بالله اختي جايبة 2 كيلو بصل ابيض من باب عمر باشا ب 25 جنيه

و كيلو ونص طماطم ب 10 جنيه

و 2 كليو بطاطس ب 20 جنيه 

و الجزر رجع ملوش قيمة تاني مرمي في درج التلاجة 😏

 

⚡الرز بقا ب 24 في المنافذ

و في فتح الله

و في كارفور

و في صن مول

ومش معقول ابقا انا في ام القطب الشمالي

و بدورلكم و الله 🙄

و لساكنات التجمع

عادي جدا تنزلي عند كوبري اسماعيل الفنجري و انتي راجعة من الشغل فتح الله

او صن مول عمارات التوفيق

خدي الباص بد10 جنيه و ارجعي مش لازم اوبر

هتلاقي الاسعار مناسبة جدااا

الفراخ و اللحمة اليومين دول عيد المسيحيين و احنا لو مستغلناش بعض و نكدنا علي بعض منبقاش احنا طبعا 🤷🏻‍♀️🤷🏻‍♀️

 

وصلت في عيد الاضحي ل 400 جنيه و نزلت

و الفراخ كانت وصلت ل 87 و نزلت حاليا ل 67 جنيه

” و بلاش و النبي لا عندي تحت البيت ب 69 .. عشان انا باخد علاج للمرارة حاليا 🙄”

 

الحكومة قررت طبع الاسعار علي 7 سلع و بحلول فبراير هتزود كمان 6 سلع

متشتريش حاجة غير مسعرة 🤷🏻‍♀️🤷🏻‍♀️

 

هل كده الاسعار منزلتش من اول يناير

لا نزلت اهووووو

و الناس اشترت اهووووو

و الاسواق بدأت تستقر اهو

محدش قال ان 1 يناير البيضة بقرش

قولنا الاسعار هتنزل في السلع الغذائية عشان الناس تبدأ تشعر بتحسن تباعا

لحين هبوط التضخم اللي بيحصل بالفعل

 

معرفش بقا حوار احنا مش عارفين نقول للناس ايه .. اصل النت زاد

اقفلوه ….. اكسبوا ثواب فينا و اقفلوه 🙄🙄