ركن الكراكيب

 لما بتبعد فترة عن الناس وتاخد جنب بتعرف أد إيه كانت بعض إختياراتك غلط والقليل فيها كان صح الصح ، القريب إتركن ي ركن الكراكيب والغريب قرب لقلبك غصب عنك

بفعله ومشاعره للصادقه تجاهك

أهتعرف إن التخلى عن أشياء كتير ممتع و سهل وعادى جدا، ممكن تتخلى عن عادة كنت بتعملها كل يوم، هتبقى كوباية القهوة الصبح أهم من ناس كتير أوى فى حياتك، كان اهتمامك بيهم يعني بالنسبالك الماء والهواء 

يعنى أنا مش مرتاح و مش مبسوط ف علاقتنا ف مش هكمل، هتقوم من وسط خروجه كنت مستنيها، بتوصل انك ممكن تسيب شغلك أو شركتك عشان بس مش مرتاح، الراحة بتتناسب عقليا مع إدراكك لقيمة نفسك، حبك لنفسك بيزيد كل ما تبعد عن الناس و كل ما تقدر تستغنى أكتر فتحب نفسك أكتر و أكتر و تبذل طاقة لحب ناس تانية تستحق الحب ده.

 

هتلاقى العند فى الغلط قمه الجهل و العبث، وإننا مش ملايكه بس مش مُطالب تفضل تلتمس لغيرك العُذر لحد ما تتغير حاجة حلوة فيك .

هتعرف إن الحب موجود و المودة والرحمة هما الحب الحقيقي كل ده هتوصله في مرحلة نضج ملهاش سن معين بتبطل تعاتب و لا تلوم ، راحتك بتكون ف البعد عن ناس كتير ، المتعة بتبقى ف مساحتك الشخصية و ال Comfort zone بتاعتك بتكون سلاحك ،هتعرف ان في معظم الوقت أكتر واحد حواليه ناس كتير هو أكتر واحد حاسس بالوحدة و مش مبسوط ،هتعرف ان الحياه و العلاقات محتاجة طاقة ومجهود و فرهده و بهدله كمان عشان تنجح و تكمل ، هتلاقى المواجهه أقوى من الهروب، هتعرف ان اللي عايز يوصل لحاجة هيوصلها بس هو اللي مكسّل،

هتعرف إن الناس هتتكلم مهما تعمل وإنك مهما تعمل لن ولم تنجو من سوء الظن، هتعرف إن من أول أسباب الفشل سماعك لكلام الناس ، هتعرف إن الحاجة اللى مبتجيش ف وقتها أحسن متجيش، هتعرف إن اللى هتفضل مستنية و مجاش، بيجى أول ما تبطل تستناه ..

هتعرف إن العلاقات طول ما هى بعيدة مريحه أوى، الوقت بينسى،و النسيان دايما نعمه ، والمتعة ف القرار الصعب والسهل دة بلاش منه و الاختيارات بقت دايماً صعبة ،هتلاقى إن مهما كان حواليك ناس كتير محدش لسه عارفاك، هتعرف إن السوشال ميديا الزيف فيه أكتر من حقيقته؛عالم مزيف جدا ،هتعرف إن من أحلى مراحل الحياة لما تحس إنك بقيت ناضج كل يوم عن الأول، لما تلاقى نفسك مبقتش تنبهر بالحاحة زى الأول و كُل ما تزعل بتضحك أول بأول .. 

هتعرف إن البُعد عن ناس معينه مش وحش وإنه غنيمه ومكسب ليك بدل ما تخسر نفسك …

✍️ مروه الألفى