ربيع جمال الجوهري يكتب (المرأة بين الجدعنة والاسترجال!!!!)

منذ فترات زمانية ليست ببعيدة كنت تلاقي الرجل لا يسمح لزوجته بالنزول لشراء طلبات البيت !!
كان كل يوم وهو راجع يتكلم في التليفون ويسأل زوجته : محتاجة جبن او عيش أو فاكهة أو مسحوق غسيل أو عايزة طماطم وخيار أو اي حاجة للسلطة !!)

وكانت المكالمة اليومية شبه محفوظة ، وكان العادي إن لو البيت نقص فيه حاجة فالرجل هو اللي كان بيجيبها معاه !!
لدرجة انه كان بيشارك زوجته في تجهيز الساندوتشات وهي كانت تحضر للاولاد الشنط وتلبسهم وتسرح لهم شعرهم وكان يطلع مع أولاده يوصلهم للمدرسة و يجبهم منها ، وفي الأيام الي كان يبقي مش في البيت لظروف عمله كنت تلاقي الخال العزيز يتولي مسئولية إنه يوديهم المدرسة والام كانت تنزل تجيبهم منها عادي ، ووقتها كان كل ده حاجه عاديه ، ماعرفش اتحولت فكرة إن الست تشيل الشيلة لوحدها ديه إمتي وازاي ؟!
ولو لقينا رجل بس بيجيب حاجة لمراته ولا واقف مع مراته بقت الدنيا تتشال وتتحط وشوفوا المثل الرائع الرهيب الفظيع ده !!!
ياجدعان ماهو ده العادي ده العاااااااااااادي !!

لو سألتوا مأذون هايقول إن معظم الستات بتتطلق علي الإبراء (إنها ترضي بإبراء زوجها من حق لها عليه؛ كمؤخر الصداق أو دين ثابت بذمته مثلا أو غير ذلك من الحقوق)
وكمان لو شوفتوا النوادي هاتلاقوا الأمهات هي الي دائماً مع ولادها في التمارين ، ولو رحتوا عيادات النساء والولادة والأطفال هاتلاقوا الأم مع صاحبتها ولا مع امها لكن مش مع جوزها …و من هنا لازم نسأل نفسنا سؤال ؟!
هو حصل إيه في مفهوم كلمة رجل عبر السنين الي فاتت !!!
أنا مش بعمم ، لانه فيه رجالة عارفة مسئولياتها كويس وفاهمة دورها صح ، بس أنا عندي رأي وده وجهة نظر لا أكثر ولا أقل تحتمل الصواب وتحتمل الخطأ ، وهي إن السبب في المشكلة هي الست بسبب
١- إنها شالت أكتر من طاقتها وماقالتش لأ
٢- المسميات الخاصة بإنها جدعة وب١٠٠ رجل والكلام ده خلاها تعمل حاجات مش بتاعتها لمجرد إثبات وجهة نظر !!!
٣- وطبعا الرجل لقي حد بيقول له:- تعالَ هاشيل عنك، قال :- يامراحب حد يكره ومن هنا بدأ الخلل !!

مع إن قوة الست عمرها ماكانت في الشيل والهتافات والكلام ده لكن الست قوتها في إنها تفضل ست وتقوم بدورها في حياة الأسرة :- تربي وتعلم وتسمو بالروح والفكر والخُلق علشان تقدم للمجتمع والدين شخص سوي ونموذج يحتذي به …

كونك إنك عايزة تبقي جدعه مش غلط بالعكس الست الجدعة ست تشرف ، بس فيه فرق ما بين الجدعنة والإسترجال واني اشيل شيلة مش بتاعتي !!
وإن كنت عايزة تكوني جدعة ابعدي عن الصوت العالي والضغط وجملة (هاوريكم كلكم )واصبري وشجعي زوجك واهتمّي بأولادك …
ده ممكن تكوني جدعة من غير ماتحرقي دمك وتدمري اعصابك لأنك انت كده بتنتحري …
يا ريت يرجع الرجل رجل والست ست والكل يبقي عارف حقوفه وواجباته!!