ربيع جمال الجوهرى يكتب (عمل الزوجين وتأمين مستقبل الأولاد!!!)

ماذا لو كان الزوجة تعمل والزوج يعمل ؟؟
الاجابة بالطبع :- سيعيش كلاهما في مستوي اجتماعي متميز
ما أثر عملهما علي تربية الاطفال ؟؟
يا عم عادي ده الطفل هيعيش عيشة هنيّة

طيب ركز في هذه القصة التي قد تكون واقعية في الأحداث والأشخاص
عندنا زوج وزوجة.. ربنا كرمهم بطفل
الزوج بيشتغل والزوجة بتشتغل.. ففكروا هما الاتنين في حل عبقري للطفل لأن مفيش جدو ولا تيتة متاحين..
إحنا هنودي ابننا حضانة يلعب فيها ويتعلم قبل المدرسة..

طبعاً بعد لفة طويلة.. و حضانة ألماني وحضانة أمريكاني وحضانة تايواني.. استقروا على حضانة ناس كتير بتشكر فيها وسمعتها زي الألف
وكمان ودي أهم نقطة بتخلي الأب والأم يتابعوا ولادهم لايف من خلال الكاميرات من موبايلهم .. حاجة في منتهي العظمة وما فيش أمان أكتر من كده..

طيب فين المشكلة؟
لا مفيش مشكلة خالص بالعكس الزوج والزوجة يسيبوا الطفل الساعة 7 ونص صباحا ويرجعوا ياخدوه الساعة 8 او 9 بالليل ، لدرجة إنه بيتغير عليه 3 شيفتات لنانات ومدرسات ، وطبعاً بياخدوه نايم ، ويودوه شبه نايم وتقريبا مابيلحقش يقعد مع بابا ولا يلاعب ماما وكل حياته في ال 12 أو 13 ساعة إللي في الحضانة العظيمة دي..

الحضانة بقى مش تلايمها ، لا!!
الإخلاص بقى والتفاني في العمل ، ده بيكلموا الطفل ويلاعبوه ويعلموه ويأكّلوه ويشرّبوه ، الطفل بيتعلم وبيحب الناني والحضانة وبيلعب وبيجري وآخر انبساط
لحد ما بدأ الأب والأم يلاحظوا إن الطفل بدأ يستغربهم ، ولما بيكون صاحي بيقاوم علشان ما يروّحش معاهم ولما بيروحوا زيارات عائلية بيكسر ويخبط ويعيط وعنيف جدا مع أي حد
وسبحان الله بمجرد ما يرجع الحضانة يرجع فرفوش وقمور وزي العسول..

طيب إيه.. نسيب الحضانة؟ خلاص سبناها ونحل المشكلة دي بأن الزوجة تاخد اجازة مؤقتا لأن قلبها بدأ يوجعها وتحس بتأنيب ضمير طيب إيه؟ تأنيب الضمير جاب نتيجة؟ لا ، ده الطفل مكتئب اكتئاب حاد وبيتعامل مع بابا وماما على إنهم اغراب و بينادي على النانات والمدرسات وعايش في عالم موازي..

حقيقي أنا ما أعرفش القصة دي انتهت على إيه.. بس قولنا 100 مرة إن مش الشطارة انك تبقى قادر تتجوز ماديا ، وتبقى قادر تخلف ماديا ، بس معندكش وقت كزوج لابنك ومراتك ، ومراتك نفسها معندهاش وقت لابنك ولا ليك ، وأحلى مسا على تأمين المستقبل والشمع إللي بيحترق من أجل الحياة الكريمة وقسط النادي وقسط مش عارف إيه

الطفل ده على الأقل محتاج 6 سنين من يوم ما ييجي الدنيا لغاية ما يروح مدرسة نظامي.. يسمع ويتكلم ويقعد ويخرج مع أهله.. يتواصل اجتماعيا وبدنيا معاهم.. يعرف هو مين وبينتمي لمين ويعني إيه بيت وعيلة..
آه الحياة صعبة والدنيا بتضيق ولو ماعملناش كده مش هنعيش ،
بس هل في المقابل والحيطة المايلة إن الروح اللي جبتوها دي ترموها ما بين أربع حيطان وتراقبوه بالكاميرات ولا كأنكم جايبين حيوان أليف.. ده في ناس عندها قطط وكلاب بتخاف تسيبها في البيت أكتر من 6 ساعات لوحدها ، تقوموا انتو ترموا ابنكم 13 ساعة؟

ماتعرفش مين بيودي لفين ، بس الحاجات البديهية إللي أمي وجدتي كانوا بيحكوا عنها زمان انضرب فيها مفك ، وكل اتنين متجوزين دلوقتي بيخلفوا يرموا على تيتة وجدو ولو مفيش ارمي في حضانة ، ورانا أكل عيش يابا وكل ده تحت شعار (بنأمن مستقبله) الطفل ده ملوش مستقبل لو اتحرم من ماضيه وذكرياته معاكم ، انتوا بتودوه في قفص بكاميرات وهو صغير هيرميكم في دار رعاية مسنين وانتو كبار